Cyfleoedd a Chyllid ar gyfer Ieuenctid

Pam cymryd rhan yn Erasmus+?

Mae Erasmus+ yn rhoi cyfle i bobl ifanc a gweithwyr ieuenctid deithio, cysylltu a chydweithio â chymheiriaid dramor drwy gynlluniau cyfnewid a phartneriaethau. Bydd cyllid Erasmus+ yn cefnogi pobl ifanc a gweithwyr ieuenctid yn y DU drwy roi cyfle iddynt archwilio syniadau newydd ac ehangu eu gorwelion. Byddant yn gallu cynllunio a chyflawni prosiectau a fydd yn gwneud gwahaniaeth cadarnhaol i’w cymunedau gyda phwyslais ar faterion sy’n bwysig i bobl ifanc. Mae hyn oll yn helpu pobl ifanc i gymryd rhan yn eu cymunedau, a’u helpu i siapio dyfodol mwy cadarnhaol iddynt eu hunain a’u cymunedau. Gyda dewis o opsiynau hyblyg a chyllid ar gyfer teithio dramor, mae Erasmus+ yn agor cyfleodd i bobl a fyddai fel arall efallai’n methu manteisio oherwydd rhwystrau cymdeithasol neu economaidd.

Pa gyfleoedd sydd ar gael?

Prosiectau symudedd (Cam Gweithredu Allweddol 1)

Gall pobl ifanc a gweithwyr ieuenctid ennill profiad rhyngwladol a meithrin cysylltiadau newydd drwy’r cyllid sydd ar gael i deithio dramor. Mae ceisiadau ar gyfer prosiectau symudedd yn cael ei rheoli gan yr Asiantaeth Genedlaethol.

Cyfleoedd i bobl ifanc

Rhaglenni Cyfnewid i Ieuenctid: Mae’r rhaglenni cyfnewid hyn yn dod â phobl ifanc o ddwy wlad wahanol o leiaf at ei gilydd i ddysgu drwy weithgareddau fel gweithdai, dadleuon a gweithgareddau awyr agored. Gall rhaglenni cyfnewid i Ieuenctid bara am rhwng 5 diwrnod a 21 diwrnod.
Rhaglen ‘Discover EU’ a ‘Discover EU Inclusion Action’: Mae ‘Discover EU’ yn rhoi cyfle i bobl 18 oed deithio ar draws Ewrop (yn bennaf ar drên), gan ddysgu am dreftadaeth ddiwylliannol a chysylltu â phobl eraill. Gall pobl ifanc deithio ar eu pennau eu hunain neu mewn grŵp o hyd at bump. Mae rhaglen ‘Discover EU Inclusion Action’ yn rhoi cyfle i bobl ifanc rhwng 18 a 21 oed sydd â llai o gyfleoedd neu sy’n wynebu rhwystrau i deithio gydag adnoddau a chefnogaeth ychwanegol.
Prosiectau Cyfranogiad Ieuenctid: Mae prosiectau o’r math yma’n helpu pobl ifanc i gymryd rhan ym mywyd democrataidd, diwylliannol a gwleidyddol eu cymunedau a’r byd o’u cwmpas a lleisio’u barn ar faterion sydd o bwys iddynt. Mae gweithgareddau’n cynnwys gweithdai, dadleuon, digwyddiadau chwarae rôl, efelychiadau, defnyddio adnoddau digidol, ymgyrchoedd codi ymwybyddiaeth a hyfforddi. Gall y gweithgareddau hyn gael eu cynnal yn y DU neu’n draws-wladol.

Cyfleoedd i weithwyr ieuenctid

Gall gweithwyr ieuenctid gymryd rhan mewn prosiectau symudedd i hybu eu datblygiad proffesiynol ac ehangu cwmpas sgiliau a gallu eu sefydliad. Gall gweithgareddau gynnwys seminarau, cyrsiau hyfforddi, digwyddiadau rhwydweithio, ymweliadau astudio, neu gysgodi swydd dramor. Mae gofyn i ddau sefydliad ieuenctid o leiaf, o wledydd gwahanol, i gymryd rhan yn y prosiectau hyn. Gall prosiectau bara am gyfnodau’n amrywio o dri mis i ddwy flynedd.

Partneriaethau (Cam gweithredu Allweddol 2)

Mae Erasmus+ yn darparu cyllid i alluogi sefydliadau ieuenctid ddatblygu partneriaethau gyda sefydliadau perthnasol eraill mewn gwledydd gwahanol.

Partneriaethau ar raddfa fach

Mae’r rhain yn bartneriaethau ar gyfer sefydliadau llawr gwlad llai, neu rai sy’n newydd i Erasmus+. Gall partneriaethau redeg am gyfnodau’n amrywio o chwe mis i ddwy flynedd gyda dau sefydliad (o leiaf) o wledydd gwahanol. Mae Erasmus+ yn cynnig cyllid o €30,000 neu €60,000 ar gyfer y prosiectau hyn.

Partneriaethau Cydweithredu

Mae’r rhain yn bartneriaethau sy’n addas i sefydliadau profiadol neu brosiectau mwy o faint. Maent yn brosiectau rhwng o leiaf tri sefydliad o wahanol wledydd, gyda ffocws ar ddulliau newydd ac arloesol. Disgwylir i’r prosiectau hyn redeg am rhwng un a thair blynedd. Mae grantiau o €120,000, €250,000 neu €400,000 ar gael.

Dylid cyflwyno ceisiadau am gyllid ar gyfer partneriaethau ar raddfa fach a phartneriaethau cydweithredu i’r Asiantaeth Genedlaethol.

Meithrin Gallu ym maes Ieuenctid

Cefnogaeth i fentrau cydweithredu rhyngwladol sy’n anelu i gryfhau sefydliadau ieuenctid a hyrwyddo dulliau dysgu anffurfiol mewn gwledydd sy’n gysylltiedig â’r Undeb Ewropeaidd ynghyd â chasgliad o wledydd penodol eraill. Mae grantiau o €300k ar gael ar gyfer y prosiectau, sy’n para rhwng 12 a 36 mis.

Ieuenctid Ewrop Gyda’n Gilydd / European Youth Together

Cefnogaeth i bartneriaethau traws-wladol sy’n galluogi sefydliadau ieuenctid i greu rhwydweithiau, hybu cydweithio rhanbarthol, a meithrin cyfleoedd i bobl ifanc gymryd rhan ym myd democratiaeth Ewrop. Mae gofyn fod consortiwm o bum partner o leiaf gan y prosiectau hyn - o bum gwlad Erasmus+ wahanol (Aelod-wladwriaethau’r UE a gwledydd cysylltiedig). Mae’r rhaglen yn darparu grantiau o hyd at €500k ar gyfer prosiectau 24 mis.

Dylid gwneud ceisiadau ar gyfer y prosiectau hyn i Asiantaeth Weithredol Ewrop dros Addysg a Diwylliant (EACEA).

Pwy sy’n gallu gwneud cais am gyllid ieuenctid?

Sefydliad neu gymdeithas nid er elw neu Gorff Anllywodraethol; Cyrff Ieuenctid Anllywodraethol Ewropeaidd; cyrff cyhoeddus lleol, rhanbarthol neu genedlaethol; mentrau cymdeithasol; cyrff sy’n gwneud elw sy’n weithgar ym maes cyfrifoldeb cymdeithasol corfforaethol ac sydd â phrofiad profedig ym maes ieuenctid, ar yr amod nad oes gan eu cyfranogiad bwrpas masnachol ac nad yw wedi’i anelu at wneud elw.

Gallwch bori drwy ddisgrifiadau o brosiectau blaenorol am ysbrydoliaeth ar wefan Erasmus+.