City Kids: Defnyddio gwirfoddoli yn y gymuned i helpu pobl gael gwaith a thaclo unigrwydd cymdeithasol mewn dinasoedd a threfi

Cafodd menter Cyfnewid Ieuenctid Erasmus+ yn Rwmania ei gychwyn gan y bobl ifanc eu hunain, i rymuso pobl o gefndiroedd anodd i fagu hyder, teimlo’n rhan o’u cymuned, a chymryd camau i greu newid cadarnhaol yn eu hamgylcheddau trefol lleol.

Cefndir:

Dechreuodd y prosiect drwy sgwrs rhwng pobl ifanc oedd yn cymryd rhan ym mhrosiect Big City Youth. Roedden nhw am archwilio sut y gallai ffyrdd newydd o feddwl ac agwedd fentergar helpu pobl ifanc sy’n byw mewn ardaloedd trefol difreintiedig i chwalu rhwystrau a gwella eu cyfleoedd at y dyfodol. Gan weithio gyda phartneriaid o faes cynhwysiant cymdeithasol a chyflogadwyedd pobl ifanc o ardaloedd trefol difreintiedig, aeth y tîm ati i ddiffinio amcanion y prosiect.

Amcanion y prosiect: Troi syniadau pobl ifanc yn weithredu

Gan ganolbwyntio ar bobl ifanc yn Estonia, Ffrainc, Rwmania a’r DU o gymunedau sy’n wynebu heriau cymdeithasol ac economaidd sylweddol, roedd y prosiect yn hybu gwirfoddoli fel man cychwyn a ffordd i mewn i fyd gwaith. Roedd y prosiect am rymuso pobl ifanc drwy ddangos fod y gallu gan bob un ohonynt i ysgogi newid. At hynny, roedd y prosiect hefyd yn anelu i ddod â’r sector gwirfoddoli a’r farchnad swyddi yn nes at ei gilydd, ac annog pobl ifanc i fod yn fwy amlwg a gweithredol yn eu cymunedau.

Datblygodd tîm y prosiect weithgareddau i sbarduno meddwl yn greadigol i helpu’r bobl ifanc oresgyn yr ofnau a’r digalondid maen nhw’n ei deimlo wrth wynebu rhwystrau addysgol, cymdeithasol, neu wrth chwilio am waith. Edrychon nhw ar sut mae gwaith tîm, cyfathrebu, trefnu, a datrys problemau yn gallu meithrin profiadau gwerthfawr a chryfhau CV. Cafodd y cyfranogwyr gyfle i ddefnyddio offer ymarferol i greu syniadau, llunio strategaethau, a dysgu hanfodion rheoli prosiect – i’w galluogi i sefydlu mentrau i daclo heriau trefol. Bu’r profiadau hyn nid yn unig yn hwb mawr i’w datblygiad personol, ond hefyd yn ffordd o osod sylfeini ar gyfer prosiectau dan arweiniad pobl ifanc yn y dyfodol a ffurfio partneriaethau trawsffiniol newydd.

Rhoi’r prosiect ar waith: datblygu sgiliau i fanteisio ar gyfleoedd go iawn

Roedd pedwar prif gymal i’r prosiect: paratoi, Ymweliad Cynllunio Ymlaen Llaw (APV), y Cyfnewid Ieuenctid yn Bucharest, a gweithgareddau i rannu gwybodaeth a gwersi a ddysgwyd. Cafodd yr holl weithgareddau eu llunio i hybu goddefgarwch, gwaith tîm, cydweithredu, dysgu drwy brofiad, arloesi, a meddwl yn feirniadol.

Yn ystod y cymal paratoi, aeth partneriaid y prosiect ati i godi ymwybyddiaeth yn lleol, gwneud ymchwil, cynnal cyfarfodydd rhwydweithio ar-lein, cadarnhau cynllun gwaith y prosiect, a sefydlu sianeli cyfathrebu, rhestr o gyfrifoldebau ac amserlenni.

Cymerodd dau gynrychiolydd o bob sefydliad partner ran yn yr Ymweliad Cynllunio Ymlaen Llaw yn Bucharest, yn Rwmania. Yn y cyfarfodydd hynny, cawsant gyfle i drafod logisteg y rhaglen, archwilio’r ganolfan, trafod gwahanol elfennau’r rhaglen, a chynnal asesiadau risg trylwyr ar gyfer y cyfnod ar ôl y pandemig.

Yn ystod y Cyfnewid Ieuenctid daeth 60 o bobl ifanc a 12 o arweinyddion grŵp at ei gilydd ar gyfer cyfres o weithdai yn edrych ar sgiliau meddal, arloesi, cyflogadwyedd a chynhwysiant cymdeithasol. Roedd y cyfranogwyr yn cynrychioli cymunedau trefol sy’n wynebu heriau cymdeithasol ac economaidd yng Ngorllewin Canolbarth Lloegr (y DU), La Bocca yn Cannes (Ffrainc), ardaloedd dinesig yn Bucharest (Rwmania) a Telliskivi yn Tallin (Estonia).

Roedd llawer ohonynt yn ymdopi â’r heriau o fod ‘heb fod mewn cyflogaeth, addysg na hyfforddiant’ (NEET); roedd pob un o’r cyfranogwyr yn gwybod pa mor galed gall bywyd trefol fod i berson ifanc. Iddyn nhw, roedd y prosiect yn cynnig ymyrraeth gynnar drwy ddysgu anffurfiol a gwirfoddoli.

Roedd y Cyfnewid yn dilyn tri cham syml.

1. Bu’r cyfranogwyr yn ystyried pam fod sgiliau meddal a sgiliau trosglwyddadwy yn bwysig ar gyfer ffeindio gwaith, ac ar gyfer cynhwysiant cymdeithasol.
2. Fe wnaethon nhw nodi eu cryfderau eu hunain a’r meysydd lle gallent wella, cyn rhoi’r sgiliau hyn ar waith drwy weithdai a gwirfoddoli.
3. Fe ddefnyddion nhw’r hyn roeddent wedi’i ddysgu i greu strategaethau cyflogaeth personol.

Cafodd pob cyfranogwr gyfle i ddatblygu eu Map i Gyflogadwyedd personol eu hunain, i’w helpu i nodi eu camau realistig nesaf i gyrraedd addysg bellach, gwaith cyflogedig, neu hunan-gyflogaeth. Hefyd, fe wnaethon nhw greu CVs Europass, fel bod ganddynt adnodd a ffordd glir i ddisgrifio eu sgiliau a’u profiad i ddarpar gyflogwyr.

Un o uchafbwyntiau’r Cyfnewid oedd y cyfle a gafodd y cyfranogwyr i gynllunio a chyflwyno eu mentrau gwirfoddoli cymunedol eu hunain. Roedd y rhain yn cynnwys: ‘Bwydo’r Tlawd’, ‘Dawnsio i Godi Calon’, ‘Amser Ymarfer Corff’, ‘Cadw’r Lle’n Daclus’, ac ‘Cadw ar ôl Darllen’

Rhoddodd y mentrau hyn gyfle iddyn nhw ymgysylltu’n uniongyrchol â chymunedau lleol yn Bucharest, cael profiad byd go iawn o effaith eu mentrau, a gweld sut y gallai eu gwaith roi pleser a chefnogaeth i bobl a hybu newid cadarnhaol. I lawer, dyma oedd eu profiad cyntaf o arwain gweithgaredd cyhoeddus, ac roedd y teimlad o lwyddiant yn enfawr.

Canlyniadau: Hyder, Cysylltiadau, a newid Parhaol

Roedd canlyniadau’r prosiect yn sylweddol. Nododd y cyfranogwyr eu bod wedi gweld gwelliant o ran: gweithio fel rhan o dîm; cyfathrebu; addasu; datrys problemau; meddwl yn feirniadol; creadigrwydd; rheoli amser; a gallu ‘gollwng gafael er mwyn dysgu o’r newydd’. Mae cyflogwyr yn rhoi gwerth mawr ar y sgiliau hyn - hyd yn oed os nad ydynt yn cael eu nodi’n uniongyrchol mewn disgrifiadau swydd (ac nid ydynt yn sgiliau sy’n cael eu dysgu’n aml fel rhan o addysg ffurfiol). Aeth dros hanner y cyfranogwyr yn eu blaenau i fanteisio ar gyfleoedd addysg bellach, gan gynnwys addysg alwedigaethol ac uwch, daliodd eraill ati i wirfoddoli, a llwyddodd sawl un i gael gwaith llawn amser.

Roedd yr ymgyrch i hybu sgiliau gwaith a drefnwyd gan y cyfranogwyr yn eu cymunedau lleol eu hunain ar ôl dychwelyd yn un o lwyddiannau nodedig y prosiect. Defnyddiodd y cyfranogwyr eu sgiliau newydd i annog cyfoedion di-waith wrth fod yn fodelau rôl a dangos y gall pob person ifanc weithio a chyrraedd eu nodau, os yw’r cymorth priodol ar gael.

Dangosodd y prosiect i’r bobl ifanc a gymerodd ran sut mae gwirfoddoli’n gallu trawsnewid bywydau, meithrin hyder, a dyfnhau ymgysylltiad cymunedol.

Yn gyffredinol, mae’r prosiect wedi cryfhau cyfleoedd bywyd y bobl ifanc a gymerodd ran, gan ehangu eu dyheadau a’u grymuso i gyfrannu a gweithredu i hybu newid cadarnhaol yn eu cymunedau.

Efallai mai’r canlyniad mwyaf pwerus oedd gweld pobl ifanc yn trawsffurfio, magu hyder, trechu ofnau, gwneud ffrindiau rhyngwladol, a darganfod eu bod yn gallu sbarduno newid.

I gael mwy o wybodaeth am yr astudiaeth achos yma, ewch i fas data prosiectau Erasmus+. 

'Mae cyllid Erasmus+ yn gatalydd pwerus i dwf, hyder, a chyfleoedd y gall pobl ifanc fanteisio arnynt. Mae’n rhoi cyfle i gyfranogwyr gamu y tu hwnt i’w hamgylchedd bob dydd, cwrdd â chyfoedion o bob rhan o Ewrop, a datblygu sgiliau go iawn ar gyfer bywyd, gwaith, a gweithredu yn eu cymunedau.'